Ritstífla

Að hafa vaðið fyrir neðan sig!!

2007-03-04T11:15:00.000-08:00

Sumt fólk veður í villu!
Sumir vaða á súðum!
Einhverjir vaða í seðlum!
Margir vaða úr einu í annað!
Sagt er að til séu þeir sem "vaði reyk"!
Allt er vaðandi í spillingu!
Sumir/sumar vaða í kerlingum/körlum/(báðu)!!

Þá er nú miklu einfaldara að vera tungl!!
Ef það á annað borð veður þá er það bara í skýjum!!! ;)

Ær og kýr....

2007-02-17T16:03:00.000-08:00

Fyrir fáeinum tímum sat ég fyrir framan sjónvarpið og var að bíða eftir því að þáttur í Battlestar Galactica hæfist á Skjá einum (já ég er "kræktur"!!) og skipti reglulega yfir á "sjónvarp lýðveldisins" þar sem fólk var að missa sig í "Evrópu-sýninni".
Ekki svo sem í frásögu færandi, allir sigurvegarar (eins og í kosningum pólítíkusanna) og flestir viðurkenndu formúlusmíð en eitt fékk mig til að hlæja upphátt:
Fréttamaður: Nú er mér sagt að þú sért mikill hestamaður (spurnartónn í fullyrðingunni!).
Höfundurinn: Já, hestaferðalög eru mínar ær og kýr!

Af hverju tókst aumingja manninum ekki að flækja saman fleiri nytjadýrum í svar sitt, ég spurði sesunaut minn (ég skildi þetta nefnilega sem "hestar eru mínar ær og kýr") hvort maðurinn væri með þessu að lýsa því hvernig hann nýtti hrossin sín!! ;)

En að allt öðru!
Ég legg til að ef þessi Lewis flytur til Íslands sem fullorðinn maður þá taki hann sér upp íslenska nafnið Kristinn!

Að lokum spurning sem hefur brunnið á mér í áratug eða meira:
Hver er þessi Flatus!?!

Áramót!!

2006-12-31T11:40:00.000-08:00

Rosalega var þetta síðasta ár fljótt að líða!!

Nú þegar aðeins u.þ.b. 4 klst. eru eftir af þessu ári þá er maður bara nokkuð sáttur, sérstaklega með seinni hlutann :)

Þó auðvitað hefði verið flott að fá "svalt" veður um áramótin þá er ágætis tilbreyting í "suddalegu" veðri eins og einn morgunhaninn á "Gufunni 2" kallaði blautviðrið :)

Smá nöldur hérna:
Finnst einhverjum öðrum en mér "uppsagnar-KB-banka" auglýsingarnar vera hallærislegur vottur um veruleikafyrringu þeirra sem hafa mannaforráð gagnvart almenningi sem hafa á hinn bóginn engan húmor fyrir hættunni á að missa vinnuna vegna skipulagsbreytinga "matador-mannanna"!?!?

Annars vona ég að á nýju ári muni fólk breyta verðmætamati sínu þannig að krónutalan skipti minna máli en brosstuðullinn hækki þeim mun meira :)

Að lokum nokkrar vangaveltur í tilefni tímamótanna:

Skyldi engum hafa dottið það í hug að halda róðrakeppni og kalla viðburðinn "áramót"?

Eins væri mögulegt að finna einhverja fislétta og níðsterka málmblöndu og hella deiglunni í "áramót" til að búa til léttar og sterkar árar :)

Að lokum gætu þeir sem trúa á hið yfirskilvitlega skilgreint samkomu púka sem "áramót" ;)

Geðileg græn jól!! :)

2006-12-26T14:38:00.000-08:00

Vona að enginn hafi fokið eða rignt niður um þessi jól!! :)

Merkileg þróun þetta með innkaupametið, bráðum fer að verða nauðsynlegt að notfæra sér Photoshop því enginn mun hafa tíma til að hitta ættingjana um jólin því allur tíminn fer í að afla tekna til og eyða þeim svo í gjafir og þá er nú gott að hver taki bara mynd að sjálfum sér sem síðan má líma saman í umræddu forriti ;)

Ekki veit ég hvort það fái nokkurn hljómgrunn en samt verð ég að reyna að leggja mitt að mörkum og hvetja til þess að ef fólk vill endilega gefa gjafir á næstu jólum þá skuli það leggja saman í púkk til að gefa yngstu meðlimunum nú eða hreinlega föndra eitthvað jólaskraut saman og spila.
Árangurinn yrði stórkostlegur og margvíslegur:
1. Meiri samvera
2. Minni kortaskuldir
3. Minna rusl
4. Minna um "tískugjafaslys" (margir gefa sömu gjöf, tíska í stað smekks þyggjandans)
5. Meira rekstraröryggi verslana (jólavertíðin er fullmikið happdrætti eins og er)
6. Mun minna stress

Örugglega eitthvað fleira, sem rifjast upp fyrir mér síðar ;)

Ef maður hefur "ráð undir rifi hverju" og rifin eru jú frekar mörg, er maður þá ekki alveg svakalega "ráðríkur"!?!

Tæknileg mistök!!

2006-11-15T10:03:00.000-08:00

Ég hef hér með ákveðið að í hvert sinn sem einhver sakar mig um að hafa gert eitthvað rangt þá muni ég reyna að róa hlutaðeigandi með því að ég hafi aðeins gert "tæknileg mistök"!!!

Þetta virðist svínvirka eða það mætti a.m.k. halda það því bæði heilu ríkisstrjórnirnar og fyrrum "skammtíma-gestir" ríkisins nota þetta orðalag þegar þeir eru sakaðir um misalvarlega hluti, allt frá grjótgirnd upp í fjöldalífstyttingar!!

Fyrstu "tæknilegu mistökin" sem ég tel skyldu mína að viðurkenna eru auðvitað þau að hafa undanfarinn einn og hálfan mánuðinn drekkt lesendum þessa bloggs í færslum! Ég á bara eftir að finna út nákvæmlega á hvern hátt tæknin brást mér í þeim efnum :)

Svo var ég nú reyndar að rifja upp rétt áðan að þegar ég var á unglingsaldri þá datt mér í hug að prófa hvernig það væri að hjóla með hægri hönd á vinstri stýrisenda og vinstri höndina á þeim hægri!
Þetta gékk bara fínt lengi vel meðan ég hjólaði beint, reyndar svo vel að þegar kom að því að ég þurfti að taka hægri beygju svolitlu síðar þá var ég greinilega búinn að gleyma víxlinu, hallaði mér í beygjuna og beitti höndunum á mjög svo venjulegan hátt ... með harla óvenjulegum afleiðingum!!!

Er til tíma-úrgangur?! (e. waste of time)
Ef litir ormar myndu sjá um að láta úrið mitt ganga væri þá hægt að tala um lífrænan úrgang!!??

Heyrumst :)

Afar gamlir ...

2006-09-27T00:30:00.000-07:00

Síðasta mánudagskvöld fékk ég þær fréttir að annar hálfbróðir minn væri orðinn afi og að sjálfsögðu varð ég gráhærður á einni nóttu í samúðarskyni ;)
Ég geymi reyndar þessi gráu hár undir húðinni og dreg þau bara fram við
viðeigandi tilefni :)

Þetta gerir mig þá hálfafabróðir sem hljómar reyndar soldið eins og bróðir
minn sé hálfafi hvað sem það nú þýðir ;)
Það er a.m.k. ljóst að ekki er ég hálfbróðurafi eða bróðurhálfafi eða
afabróðurhelmingur eða bróðurafahelmingur ;)
Var allt í einu að fatta þetta, útilokunaraðferðin, átti eftir einn
möguleika af sex en sá er einmitt sá rétti, nefnilega afahálfbróðir!! :)

Þetta þýðir reyndar að ég á langafa fyrir föður, sem hljómar reyndar eins
og nokkuð góð skifti ;)

Annars ákvað ég að þar sem engin skipulögð hreyfing var hjá mér
eftir vinnu í gær að rölta niður Laugaveginn, hef aldrei beinlínis
heillast af Þorláksmessubröltinu þar niðureftir en nú var loksins góð
ástæða til að slíta sólunum auk þess sem múgurinn var allur að fara
niðureftir svo þetta gekk örugglega betur en á Þorláksmessunni þar sem
allir ráfa stefnulaust í stressinu ;)
Hefði reyndar kosið að Ómar hefði gert þetta fyrr, þó auðvitað sé kannski
áhrifaríkara að vera kominn með landskika sem "píslarvott" ...

Er píslarvottur e.t.v. smæsta af smáu, þ.e. rétt svo vottur af písl, eiginlega barasta ósýnilegt ;)

Var í gær að koma með vöru inn á stóran lager þar sem einn var að hamast á
lyftara og ætlaði að henda í hann nótunni til kvittunar en sá frábauð sér
eiginhandaráritunina á þeirri forsendu að hann væri ekki "að vinna hérna",
ég reyndi á móti að koma honum í skilning um að bæði væri hann einmitt
"hérna" og mér sýndist hann vera að vinna, a.m.k. væri þetta all undarlegt
tómstundargaman ef það væri málið :)
Hann virtist ekki skilja útúrsnúninginn ;)

Entur = viðvera = Gosi ...

Ný leið til að stíga af hjólinu ...

2006-09-19T10:01:00.000-07:00

Í gær, hálf sex eftir hádegi, var ég á leið í bandý á hjólinu þegar allt í einu gengur manneskja út úr bakaríi í veg fyrir hjólið, ég bremsa að aftan en það dugir ekki til svo ég negli niður með frambremsunni og finn hvernig hjólið snarstoppar og byrjar að steypast!!
Nú sér fólk e.t.v. fyrir sér undirritaðann og hjólið í einni flækju á gangstéttinni ásamt íþróttadótinu en nei niðurstaðan varð víst allt önnur og furðulegri!!
Venjulega hefði ég ríghaldið í stýrið og tekið því sem verða vildi en það næsta sem ég vissi var að ég tók 2-3 skref á stéttinni og bar fyrir mig hendurnar (því ég var um það bil að rekast á grunlausann vegfarandann) en fyrir aftan mig heyrðust skellirnir þegar hjólið rúllaði! Mér hafði sem sagt tekist að stíga af hjólinu yfir stýrið ;)
Tek það samt fram að ég muni samt framvegis reyna að nota mína venjulegu aðferð við það að koma mér niður af hjólinu :)

Fólk tekur því misvel þegar það gerist líffæraþegar, margir eru sallarólegir yfir tilbreytingunni en þessum stóð reyndar ekki á sama!!

A:"Við skulum skreppa saman útí búð"
B:"Ertu viss, stíga þá ekki hinir viðskiptavinirnir ofan á okkur í ógáti"?

Heyrumst :)

...upplifa bjarmann frá sveppinum, á sviðinni grund ....

2006-08-06T16:49:00.000-07:00

Já einmitt, 61 ár síðan þetta gerðist!! :(

Erfitt að tala um stríðsglæpi án þess að minnast á þennan en á hinn bóginn er erfitt að reyna að setja einhver skil á milli stríðsglæpa og stríðs því stríð er auðvitað glæpur sama hvernig litið er á það ...

Fyrirsögnin er tilvitnun, vitið þið hvaðan?

Að vakna hlæjandi ...

2006-07-15T21:51:00.000-07:00

Hvað er betri mælikvarði á góðan draum en það?!

Kom fyrir mig síðasta laugardagsmorgun, einstaklega hressandi :)

Man reyndar ekki nákvæmlega um hvað draumurinn snérist en það gæti einfaldlega verið vegna þess að ég fór að sofa aftur ...
En áður en ég fór að sofa þá gerðist ég svo framtakssamur að krota það helsta niður, að ég hélt, en þegar ég les það núna þá er þetta soldið torrætt :)

Aðalmálið var sem sagt að þar sem ég var staddur þá var tónlist í gangi og lagið virtist vera "street life" (með Brian Ferry) sungið á japönsku eða e-u öðru asísku tungumáli nema þar sem sjálfur titill lagsins átti að koma fyrir í viðlaginu þá kom í staðin mjög svo mislukkaður framburður á orðunum "wild world" sem hljómaði soldið eins og "væld völd" og var í þokkabót sungið með allt annarri laglínu ;)

Nú er ég ekki viss um að aðrir myndu vakna upp hlæjandi vegna svona lítilræðis og það þó ég myndi bæta við að umræðan í draumnum fór að snúast um fleiri svona dæmi eins og mjög innlifaða japanska útgáfu af "smells like teen spirit" þar sem söngvarinn var að rembast við að troða öllum þeim orðum sem til þurfti inn í hröðu kaflana með sinni "bassa"-rödd ;)

Hvað get ég sagt, ég er "léttilega glettur" :)
Og jafnvel líka "glettilega léttur"! ;)

Það sem ég skrifa í framhaldinu er hins vegar mjög illskiljanlegt en kannski er við því að búast þegar pennanum er stýrt af hálfsofandi einstakling sem í þokkabót er að reyna að lýsa draum!!
Alla vega, hér kemur það sem á eftir stóð:

Var að reyna að teikna ákveðna upplifun, e-r strákur var að reyna að gera það fyrir litlu systur sína og ég vildi besserwissast, e-ð sem maður gæti ekki "upplifað" meðan maður væri að gera e-ð annað!?

Já, ég skrifaði þetta en átta mig samt ekki á þessu, minnir samt að ég hafi í draumnum verið að reyna að hjálpa einhverjum að rissa e-ð á blað og skv. málsgreininni að ofan þá hef ég verið að reyna að festa e-r hughrif á blað sem ómögulegt væri að finna fyrir meðan maður væri að gera aðra hluti!!
Held að "japanska" lagið hafi forðað mér frá þessu erfiða verkefni ;)

Stundum er sagt að maður sé alltaf "sjálfum sér næstur" en það er bara ekki rétt!!
Hver hefur ekki einhvern tímann verði "frá sér numinn", "viti sín fjær", "alveg frá sér" og þar með "ekki með sjálfum sér"!!! :)
Svo er það hreinlega ekki hollt fyrir þá sem þrá dýpri skilning á hlutunum að vera sjálfum sér næstir því þá verða þeir "engu nær"! ;)

PS. Alveg er ég viss um að E.T. hefur verið fæddur í hlutverk vasaþjófsins!! :)

Sveinbjörn Pétur

8

2006-07-02T16:15:00.000-07:00

Merkilegt hvað móðir mín og ég erum oft sammála um hluti sem almenningsálitið er á öndverðri skoðun um!!
Eitt gott dæmi er t.d. þetta með mávana, bæði erum við hreinlega að fara úr límingunum yfir þeirri erkiheimsku að nú ætli menn að fara út í einhverja stórfelldar aðgerðir til að fækka mávum ...
Hún kíkti t.d. niður á Austurvöll vegna LÍ afmælisins og sá í leiðinni að nálægt Tjörninni var einhver kona að gefa fuglunum brauð og eins og hún orðaði það, greinilega viljandi að gefa mávunum sérstaklega. Við erum bæði alveg hrikalega sátt við þetta framtak ;)
Raunar bjargaði þetta deginum fyrir henni því henni fanst afmælisumgjörðin öll frekar ræfilsleg :)

Sjálfur missti ég að öllum herlegheitunum/hallærinu, var að vinna og lenda í því tvisvar í sömu ferðinni að slíta band :(
Ekki var um að ræða liðbönd í þessu tilfelli heldur svokölluð "vagnastrekkibönd" sem notuð eru til að halda vögnunum kyrrum inni á vörupallinum, litlar skemmdir á vörum en þurfti samt að skola soldið af skyr.is drykk, g-mjólk og nýmjólk af palli, veggjum og úr lofti kassans eftir vinnudaginn ;)

Annars er hér slóð sem ég skrifaði hjá mér fyrir einhverjum árum á nokkra fróðleiksmola og merkilegt nokk, hún virkar enn ;)
Þarna er til dæmis "Ekki dugir að drepast" sem ég sá Hörð (6. júní 2006) eitt sinn nota en Oggi hafði ekki séð ;)

Gáta dagsins er tengd fyrirsögninni sem er í styttra lagi að þessu sinni, allir vita væntanlega hvað talan "8" merkir en færri vita að hér á landi má nota hana til að tákna stefnu og þá er ég ekki að tala um flugbrautarauðkenni (þar táknar "27" raunar stefnuna 270°) ;)

Heyrumst :)

nuunnan

2006-06-24T15:16:00.000-07:00

17. janúar síðastliðinn var fyrirsögn bloggfærslu hjá mér "Myrtu mig mjúklega" og ég sagði að þrátt fyrir að þessi mögnuðu orð hefðu ekki verið Theo Van Gogh efst í huga á hans síðustu andartökum þá væri til langsótt tenging við lagið "Killing me softly" með Robertu Flack. Hér kemur "keðjan":

Lagið
en textinn var innblásinn af spilamennsku
Don McLean
sem samdi lagið "American pie" en hann samdi einnig lagið
Vincent
sem var innblásið af lestri hans á bók um
Vincent Van Gogh
en einn af afkomendum bróður VVG er einmitt leikstjórinn sálugi
Theo!!

Sem sagt, MJÖG langsótt!! ;)

Fyrirsögn þessarar færslu er hins vegar til sem hluti af íslensku orði, rétt stafsettu, svo nú er bara að geta sér til um hvert orðið er en auðvitað er gefið rétt fyrir önnur rétt stafsett íslensk orð sem innihalda þennan bút ;)

Ásökunar-hliðrun ....

2006-06-11T12:22:00.000-07:00

Mér datt bara ekkert betra orð íslenskt yfir "blame-shifting" sem tengist náið orðinu "scape-goat" :)

Eftirfarandi eru nokkur sígild dæmi um þetta:

"Hvalir fækka þorskinum" í stað "Ofveiði fækkar þorskinum"

"Útlendingar draga niður launin" í stað "Óheftur kapítalismi lækkar launin"

"Mávar eru vandamál í sorpinu" í stað "Lélegur sorpfrágangur dregur að sér máva"

"Unglingavandamál" í stað "Foreldravandamál"

"Fíflið fyrir framan bremsar eins og asni!!" í stað "Of stutt bil í næst bíl á undan"

Eitt máltæki er á svipuðum nótum: "Árinni kennir illur ræðari" :)

Annars er alveg óþolandi hvað fólk leggur mikla áherslu á það neikvæða ("engar fréttir eru góðar fréttir") og þá sérstaklega á orðna hluti! :(

Stjórnmálamönnum er tamast að tala um fortíðarvanda!
Ævintýrin gömlu eru borin uppi af hrakförum og illsku og enda ekki fyrr en hlutirnir eru loks farnir að ganga vel!!
Foreldrar eyða mun meiri tíma í að skamma krakkana fyrir óþekkt heldur en að svala fróðleiksþorsta þeirra!
Fólk virðist fljótt gleyma löngum góðviðrisköflum ef það kemur einn rigningardagur!!

Og sjálfur er ég auðvitað að nöldra yfir þessu öllu í staðin fyrir að tala um eitthvað skemmtilegra!!!! ;)

17. Janúar 2006 kom smá gáta, þar sem nefna átti 4 lög með sitt hvorum flytjandanum í 80s myndum, öll samin af Giorgio Moroder :)
Mögulegt svar:
"Never ending story" úr samnefndri mynd með "Limahl"
"Electric Dreams" úr samnefndri mynd með "Philip Oakey" söngvara "Human league"
"Flashdans" úr samnefndri mynd með "Irene Cara"
"Take my breath away" úr "Top Gun" með hljómsveitinni "Berlin"

Eins og sést á þessari upptalningu þá er þetta rosalega dæmigert fyrir tímabilið, eitthvað svo .... 80s ;)

Blótað á laun ...

2006-05-31T19:04:00.000-07:00

Þegar þetta er ritað þá er langt liðið á aðfaranótt 1. júní 2006, e.t.v. ekki svo merkilegt en það þýðir þó að 31. maí er liðinn og þar með ættu margir samviskusamir sjálfsblekkjarar að vera reykjandi stíft svo liggur við meðvitundarleysi af nikótín ofgnótt!!!

En auðvitað er þetta lítill hluti reykingarmanna því þeir eru nú ekki alvitlausir vel flestir og sjá auðvitað lítinn heilsufarslegan hag í því að pína sig í einn dag á ári til þess eins að vinna tjörumissi lungnanna upp tvöfalt næsta dag og reykja svo auðvitað hina 363,2422 dagana sem eftir eru fram að næsta reyklausa degi!!

Til að fyrirbyggja allan (eða í það minnsta einn stórvægilegan) misskilning þá er ég alls ekki að mæla gegn ráðstöfunum til að draga úr reykingum, sjálfur reyki ég ekki og reyni að halda mig fjarri reyk eða stilla mér upp með vindinn í bakið, en ég á erfitt með að þola sýndarmennsku og því finnst mér dagurinn frekar mislukkaður! (sífellt dregur úr upphrópunarmerkjunum, mér er greinilega að renna reiðin ;-) )

Ég á enn eftir að hitta reykingarmanneskju sem heldur því statt og stöðugt fram að hún sé sátt við sínar reykingar og vilji að sem flestir fái notið sinnar gæfu á gráu skýi!! (úps, nú er ég greinilega aftur að æsast upp :o )

Þrátt fyrir að flestir, hvort heldur sem um er að ræða tjörufyllta eður ei, séu sem sagt að hallmæla reykingum þá virðist flest fólk sem hefur á annað borð hafið tjörutott ekkert vera á leiðinni að hætta því svo til hvers þá að einbeita sér svona að þessum hóp?!?

Ég hef mun betri hugmynd, hún er ekki ný, hún er eiginlega u.þ.b. 1000 ára gömul!!!

Svo er mál með vexti að eitt sinn voru tvenn trúarbrögð jafnrétthá í þessu landi.
Hin fyrri voru hinn gamli siður þar sem menn trúðu á verkaskiptingu margra guða sem höfðu ofurmannlega eiginleika en voru samt eitthvað svo breyskir og mannlegir í hugsun að auðvelt var fyrir almúgann að skilja þá.
Hin síðari voru innflutt frá austurlöndum nær (en samt að því er virtist eitthvað svo allt of fjarri) þar sem guðinn var einn en samt tveir og jafnvel "þrí-einn" á tillidögum, einnig gæddur/ir ofurmannlegum eiginleikum en var/voru ekkert mannlegur/ir og enginn var skapbresturinn (nema ef vera kynni eilífðarfýla gagnvart fólki sem efaðist, þ.e. hafði gagnrýna hugsun) eða annar mannlegur galli, sem var náttúrlega stór galli, því hvernig átti einhver að skilja slíkt!!
Það fór samt svo á endanum að menn vildu að "ein lög giltu á landinu" og undan feldinum kom sá dómur að hin nýinnfluttu trúarbrögð skyldu verða hin opinbera trú en hinir mættu blóta guði sína á laun.

Hver varð svo afleiðing þessarar ákvörðunar?!?
Jú, mikið rétt, ásatrúin nánast hvarf en hin trúin safnaði fullt af tómum kirkjum (smá ýkjur en sætanýtingin er að meðaltali örugglega innan við 5% á venjulegum messudegi)!!!

Lengi má örugglega þræta um réttlætingu þess að fela ásatrúna en afleiðingum þessa feluleiks verður varla á móti mælt og hér er einmitt komin lausnin á tjöruvandanum :)
Við einfaldlega hættum að reyna að banna fólki að reykja hvar og hvenær sem er heldur hvetjum það einfaldlega til þess að laumast til þess!!
Að vísu er það nú svo að þegar ég tala um hvatningu þá meina ég auðvitað þá sömu hvatningu og forfeður okkar fengu: Hörð viðurlög við því að stunda trú sína svo aðrir annarar trúar verði þess varir.

Sumir kynnu að halda að um félagslega útskúfun væri að ræða en í raun er þetta ekkert svo ósvipað notkun hlandskála! Þeir sem þær þurfa að nota gera það svo þeir sem þær þurfa ekki að nota (eða öllu heldur geta ekki með góðu móti notað) þurfi ekki að verða vitni að því ;)
Þess á milli eru að sjálfsögðu full samskipti á milli hópanna :)

Ólíkt hlandskálum þó yrði sú kvöð að ekki mætti auglýsa hvar afdrepin væri að finna því það væri lang-áhrifaríkast ef hver þyrfti að redda sér sjálfur því þá dytti út þessi tenging tjöru og hópamyndunar, þetta yrði miklu meira einstaklingspukur og því drægi vonandi úr "snjóbolta áhrifunum" sem fylgja því þegar einstaklingarnir forvitninnar vegna hætta sér of nærri leið "snjóboltans" og "klessast utan á hann" :)

Með því svo smám saman að kippa öllum tengdum hugtökum út úr daglegu máli þá mætti minnka líkurnar á því að næstu kynslóðir vissu af þessum "möguleika" en þá þyrfti auðvitað að afnema reyklausa daginn því það hugtak gæti vakið upp spurningar sem við myndum ekki vilja svara ;)

Vonandi fær enginn áfall við lestur þessarar greinar, þ.e. ef sá einstaklingur hefur gert sér þá mynd af mér að ég sé voðalega "dipló" (annað orð yfir að taka ekki afstöðu til að styggja engan), ég mátti einfaldlega til með að segja skoðun mína á þessu máli ;)

Hvort nú taki við mun ákveðnari skrif eða jafnvel að hinar öfgarnar taki við (öfgafullt afstöðuleysi!!) er erfitt að segja til um og reyndar nenni ég ekki að spá of mikið í það, geri bara það sem ég held að henti mér best hverju sinni :)

Verðugur

2006-05-27T08:23:00.000-07:00

Af hverju segjum við "áhugaverður", "athyglisverður" o.s.frv. en ekki "-verðugur" því ef e-ð er "áhugavert" þá er það "verðugt áhuga okkar"!!
Ætli segja mætti um einhvern að sá hinn sami væri "morgunverður" því sá einstaklingur væri "verðugur þess að fá að sjá morgunsólina" ;)

Rakst á þetta þegar ég var að skoða bloggið hans Tryggva, varð að prufa þetta líka :)
Kom a.m.k. betur út heldur en þegar Kermit varð full "áhugasamur" þarna um árið ;)

You scored as Carrot Ironfounderson. You are Captain Carrot Ironfounderson of the City Watch in the greatest city on the Disc - Ankh-Morprok! A truly good natured, honest guy, who knows everyone, and is liked by all. Technically a dwarf, but only by adoption. You'd rather not be reminded that you are the true heir to the throne, but that does explain why people naturally follow your orders...

Carrot Ironfounderson

88%

Gytha (Nanny) Ogg

63%

Rincewind

56%

Cohen The Barbarian

56%

Death

50%

Lord Havelock Vetinari

50%

Esmerelda (Granny) Weatherwax

50%

The Librarian

50%

Greebo

38%

Commander Samuel Vimes

31%

Which Discworld Character are you like (with pics)
created with QuizFarm.com

Tek það fram að ég er mjög slappur "nörd", hef ekki lesið Discworld bækur né sett fingurnar á lyklaborð Atari!!! ;)

Fallhlíf !?!

2006-05-13T04:15:00.000-07:00

Það er stór spurning hvort það að fallhlífin skyldi vera fundin upp hafi dregið úr eða fjölgað dauðsföllum!
Spáið soldið í það: Fallhlífarstökk úr flugvél sem áhættutómstundargaman , fallhlífarhermenn, "Basejump", ...
Þetta er eins og með "bestu mögulegu aksturs-aðstæður", þá verða oft slæm slys!!

"Áburður og vökvun" þ.a.l. "engi sprettur"
"Engisprettur" þ.a.l. "engi fer"

þá vitum við það, til þess að fá "engifer" þá þarf maður "áburð og vökvun" ;-)

Sumaróður - snjókast!!

2006-04-23T23:29:00.000-07:00

Nokkrir hlutir sem gaman er að gera á 5. degi sumars:
Fara út og búa til snjókarl
Fara í snjókast
Keyra um á sumardekkjunum í snjónum
Fara á skíði ... innanbæjar!!

Já, þá vitum við það, hvítur er nýi litur sumarsins!! ;)

Sjálfið!!!!

2006-04-15T15:31:00.000-07:00

Af hverju ég!? Af hverju hér og nú!!? Hvað með áður og ég tala nú ekki um síðar!!?
Hvað þá með alla hina; nú, fyrr og í framtíðinni!!!?

Það besta við þetta er að aðrir geta líka sett sig í spor spyrilsins ;)

Setur hlutina mjög fljótt í rétt samhengi, samskipti við annað fólk hætta að vera bara eitthvað léttvægt til að drepa tímann með!! :)

En af hverju skyldi öllum vera svona mikið í nöp við tímann!?! Helst verð ég var við hann þegar hann virðist ekki nægur!!
Því segi ég, verum góð við tímann, það besta sem við getum gefið fólki sem líkar við okkur er tími svo þá er eins gott að vera ekki of önnum kafinn við að "kála honum" ;)

Ætli tala megi um taugatitring, "innri skjálfta", sem "sjálf-ið"?
Annars hef ég aldrei séð neinn "iða í skinninu" og er ekki viss um að ég vilji sjá það því fólk sem er laust innan í skinninu getur varla litið fallega út!!!

Heyrumst :)

Sjálf sjálfs Sveinbjörns sjálfumglaða, að sjálfsögðu! ;)

Spyrnan ógurlega!!

2006-04-09T12:30:00.001-07:00

Varð vitni að því gær þegar ökumenn tveggja tryllitækja gerðu sig líklega til þess að keppa um það hvor kæmist hraðar af stað þegar græna ljósið kæmi!!

Það er kanski soldið sorglegt að það var vespan sem skildi skellinöðruna eftir í rykinu! ;)

Mynnir mann svolítið á æsinginn í kringum það þegar keppt er um sterkasta/fljótasta/liprasta keppandann á einhverjum þeim fjölda íþróttamóta sem haldin eru manna á meðal því það gleymist oftast að í raun erum við mannskepnan alls ekki neitt spés þegar talað er um líkamlega hreysti, það eru raunar fá dýr slappari ;)

Hvers vegna skyldi ég nota vélknúin tveggja hjóla tæki sem samlíkingu þegar íþróttir eru annars vegar?

Ætli ástæðurnar séu ekki a.m.k. tvær, önnur er myndin "The World's Fastest Indian" en hin er sú að nú þarf ég að fara að spá í því hvernig er best að "íþróttavæða" NÖRD næsta árið (sem nýkosin íþróttafulltrúi NÖRD) ;)

Sem sagt á einstaklega fjölmennum aðalfundi NÖRD (20+ manns úr 100-170 manna félagi!!) þá var skipt um stjórn (fyrir utan formanninn) og endaði ég í embætti sem ekki hefur verið sinnt af neinum ákveðnum síðan í byrjun síðasta hausts!!

Starfslýsingin er metnaðarfull og segir m.a. að "stuðla eigi að heilbrigði meðlima" en það ætti einmitt að vera mitt sérsvið því sjálfur hef ég sjaldan stuðlað að eins miklu eigin heilbrigði en undangengið skólaár ;)

Annars fór ég síðasta fimmtudag í hnéspeglun á vinstra og er þá búinn að láta svæfa mig tvisvar á lífsleiðinni því sumarið 2001 var hægra hnéð speglað :)
Nú skil ég loksins af hverju maður klæðist einhverju spítalasloppi fyrir aðgerð, hvaða heilvita maður myndi vilja láta sjá sig í þessari hörmung utandyra, það er því tryggt að sjúklingarnir týnast ekki einhvers staðar úti í bæ ;)

Fegurðin kemur að innan .....

2006-03-12T09:14:00.000-08:00

Fyrir skömmu tók ég þátt í umræðu um tónlist og einhverra hluta vegna barst talið að svokölluðum "eins-smells-undrum" (e. "one hit wonders") og síðan almennt að tónlist sem eldist illa, hættir að vera flott og verður í besta falli yndislega hallærisleg ;)

Af nógu er að taka og frábært að skoða bönd sem voru svo svöl að þau hefðu getað komið hvaða rusli sem er á toppinn á þeim tíma sem þau voru á hátindi frægðarinnar og komast svo að því í dag að það var einmitt það sem þau gerðu ítrekað :)

Af einhverjum orsökum fannst mér rétt að fletta upp á "wikipedia" eðalhljómsveitinni "Modern talking" og þá var nú stutt í góða skapið ;)

Ekki nóg með að þessi lesning rifji upp fyrir manni lögin sem voru eitthvað svo jafngóð að manni fannst (sem er ekkert skrítið því hvernig er hægt að klikka ef maður lætur allt hljóma 99% eins!!) heldur er greinin stökkpallur yfir í upplýsingar um jafn yndislega hluti og "Milli Vanilli" og þaðan má svo finna "Cop rock" sem samkvæmt lýsingunni hefur verið alger perla (sem glottmeðal auðvitað!!) ;)

Verð reyndar að viðurkenna að sumt sem er talið upp þarna sem þýskt popp í dulargerfi er alveg klassískt eins og t.d. "Snap!" og svo finnst mér hæfilega mikil "Boney M" klisja alveg ágæt en ég er væntanlega ekki marktækur því ég á það til að hlusta á "ABBA" og vera bara nokkuð sáttur við það þó ég sé reyndar mjög meðvitaður um háan klisjustuðul þeirrar annars ágætu hljómsveitar ;)

Einhverra hluta vegna þá virðist sú tónlist sem talin er upp sem söluhá þýsk tónlist í þessari grein oftast eldast illa og helst að Rammstein njóti einhverrar virðingar meðal þeirra sem ekki hafa staðnað í tónlist (reyndar er stór hópur sem hlustar á Enigma og álíka tónlist en það fólk fær líka oft á sig nýaldarhyggjustimpil, segla og baunaspírur).

Soldið áhyggjuefni að sá sem skrifaði greinina skyldi ekki skella inn upplýsingum um eðalrokksveitina "Scorpions" sem átti nokkra smelli sem hafa elst annars ágætlega (engin hlutdrægni hér þó hljómsveitin kenni sig við sporðdreka) en ég get samt ekki kvartað yfir þeim fróðleik sem ég fékk um þessi krúttlegu og sætu dýr ;)

Í síðustu bloggfærslu tók ég upp á því að svipta hulunni af leyndardómum þeim sem ég hafði sett fram sem gátur en engin svör höfðu borist við, hér verður hulunni svipt af miklum leyndardómi sem settur var fram sem gáta 14. janúar síðastliðinn:

Hvað er meint með: "Technicolor Yawn"?

Svarið er að finna neðarlega í þessari grein hér undir "other uses" :)

Brot af því besta

2006-02-22T11:53:00.000-08:00

Hver man ekki eftir gátunni "fyrir hvaða brot er ekki refsað?"?
Svörin gátu verið mjög fjölbreytt en vinsælast var "beinbrot" :)
Fleiri möguleikar eru auðvitað t.d.: "heilabrot", "brotabrot","landbrot","almenn brot og tugabrot", "brot sem lenda á skipum","brot í samanbrotnum flíkum","sekúndubrot","brot af kexkökum", "brot úr degi" o.s.frv.

Svo er nú hægt að vera fábrotinn, margbrotinn, stórbrotinn, brotinn á bak aftur, fyrir utan eina af minnst breyttu núlifandi lífverunum sem er auðvitað Þríbrotinn ;)

Hér að ofan hefur verið minnst á "brotakex" og "brotsjó" en einnig eru til "brotalamir" og "brotstuðlar" svo eitthvað sé nefnt :)

Annars var ég að spá í að hreinsa smá upp hérna því enn er nokkrum gátum sem ég hef kastað fram ósvarað ;)

Sú elsta er frá 1. janúar 2006 þar sem spurt var um hvaðan eftirfarandi tilvitnun væri:

"Add a dab of lavender to milk; leave town with an orange, and pretend you're laughing at it."

Hér er auðvitað á ferðinni tilvitnun í einn fyndnasta "pilot" (upphafsþátt) sem ég hef séð í gamanþáttaröðum, nefnilega "Black books", sá sem þetta mælti hafði ekki einungis gleypt í stresskasti "litle book of calm" heldur var hann farinn að rugla tilvitnunum úr henni saman eftir nett bank sem hann fékk frá ósáttum áheyrendum ;)

Fleiri leyndardómar verða afhjúpaðir síðar, heyrumst :)

Til hamingju Evrópa .....

2006-02-19T10:29:00.000-08:00

Tja, hvað getur maður sagt, varð eins og margir aðrir vitni að því þegar einn keppandi af 15 sópaði til sín 2/3 hluta atkvæðamagnsins í símakosningu í forkeppni söngsjónarspilsins í gær ;)

Vonandi fer þetta ekki eins og með lagið "Þú og þeir" sem fékk rússneska kosningu hérna heima en tillti sér í frátekið 16. sætið úti í útlandinu ....

Annars væri gaman að setja einhverjar fáránlegar kröfur um textasmíð í næstu undankeppni eins og t.d. krefjast þess að öll lögin snúist að einhverju leiti um hælsæri eða þá að það verði að vera jafn mikið af "a" og "e" í textanum.
Eins mætti banna rím og setja "klisju"-kvóta ;)

Magnað þetta með endurnar: "andaslitrur", "standa á öndinni", "endur fyrir löngu", "andfælur", "að andmæla", "andstreymi", .....

Að við tölum nú ekki um gæsirnar ;)

Stórt og smátt

2006-02-14T14:09:00.000-08:00

Magnað þetta að hafa bara 1 dag á ári tilheyrandi rómantík, hina daga ársins er allt vaðandi í pólitík!!! :(
Ég segi nú bara snúum þessu við! :)
Auk þess, tillidagarómantík er of þvingandi, rómantíkin virkar best hvers dags ;)

Stutt færsla hjá mér í dag, lýk dagsfærslunni með hefðbundnum vangaveltum.
það eru til nokkur "stórt og smátt" orðatiltæki, t.d.
"allt og sumt",
"ár og dagur" og
"allt og ekkert".

Dettur fólki fleiri svona í hug? :)

Tillitssemi

2006-02-09T14:38:00.000-08:00

Heitasta málið núna í útlandinu er auðvitað teiknimyndafárið og virðist það ætla að vefja eitthvað upp á sig.

Ég las soldið misvísandi fyrirsögn á textavarpinu nýlega en þar stóð eitthvað á þá leið að Bush væri að stilla til friðar. Ég varð auðvitað himinlifandi, hélt að loksins væri "runninn" að gera eitthvað gagn en auðvitað var hann bara að reyna að fá "skjólstæðinga" sína múslimana til að halda friðinn einhliða!

Ég hef eiginlega verið að bíða eftir því að einhverjir fulltrúar kristninnar og gyðingdómsins tækju til máls til að sýna málstað múslima samstöðu því í báðum samfélögunum er blátt bann lagt við skurðgoðadýrkun og þar með talið er bannað að búa til líkneski af guði.
Nú skal að vísu viðurkennt að í kristni þá hefur allt verið vaðandi í Kristlíkneskjum að ég tali nú ekki um alla dýrðlingana í Kaþólsku en samt held ég að ef fólk sem samþykkir bannið við guðslíkneskjasmíð hugsar aðeins málið þá sé auðvelt að skilja múslima og taka þátt í friðsömum mótmælum með þeim en að sjálfsögðu ættu allir aðilar að tala gegn ofbeldinu.

Oft hefur mér þótt sem það eina sem upp á vanti til að ná að friða miðausturlönd sé eitthvert hitamál sem múslimar og gyðingar geti orðið sammála um og sameinast um að berjast fyrir.
Við fyrstu sýn virtist mér þetta skopteikninga mál líklegt til láta allt fara í hundana en hér er kannski komin óvænt leið til að þjappa saman þorra gyðinga og múslima í Palistínu/Ísrael.

Eitt er a.m.k. alveg augljóst og hefur með öll mannleg samskipti að gera, þegar maður á samskipti við annað fólk þá hefur maður yfirleitt val á milli mismunandi umræðuefna, sum þeirra er ljóst að fólk er ósammála um en önnur er fólk sammála um og svo fer það bara eftir því hversu tillitssamt fólk er hvaða umræðum það byrjar á!

Annað sem maður hefur komist að er það að meira máli skiptir ef maður á að átta sig á fólki að hlusta eftir því hvernig það talar um aðra heldur en hvernig talað er um það :)
Nú er maður auðvitað að bjóða þeirri hættu heim að aðrir fari að taka mig til greiningar og komist þar með að því hversu mikið "spagettí" maður er, þ.e. ef það var ekki orðið ljóst fyrr ;)

Pælið aðeins í orðinu "At-vinna", soldið spés ;)

Að falla í kramið!!

2006-02-04T16:41:00.000-08:00

Ekki gott ef maður er bifvélavirki ...

Var annars að láta mér detta í hug að gott væri að búa til nýja lífsreglu.
Nú hafa ýmsir lýst efasemdum um að "lífið sé leikur" en ég er hins vegar harður á því að það sé einmitt málið, lífið ER leikur, maður þarf bara að fatta leikreglurnar ;)
Eins er lífið að sjálfsögðu dans á rósum, gallinn er bara sá að sumir eiga það til að stíga oftar á þyrnana en "iljarnar þola"!!
En aftur að nýju lífsreglunni, vandamálið við rökræður er sá að sumum hættir til að villast yfir mörkin milli rökræðu og rifrildis en þau mörk er einfalt að finna með dB-mæli eða með því að hlusta eftir lengd og fjölbreytni í orðavali (er þó ekki ennþá búinn að finna sérhæft mælitæki fyrir það) því rifrildismegin eru orðin fábreyttari og oftast eins-atkvæðis (nei, jú, víst, ....).

Hvernig kemur maður þá í veg fyrir rifrildi?
Nýja lífsreglan reddar því, kannast einhver við leikinn "frúin í Hamborg"?
Við einfaldlega setjum þá reglur um rökræður að sá sem fyrr hækkar röddina upp fyrir fyrirfram umsaminn hljóðstyrk tapar rökræðunum og eins geta menn ekki svarað fyrir sig með eins-atkvæðis orðum oftar en 4 sinnum og svo má líka takmarka eitthvað fjölda endurtekninga (að fyrirmynd þráteflis-reglna í skák).
Væri ekki hreinn unaður að horfa á umræðuþátt í sjónvarpinu þar sem fyrir utan þáttarstjórnandann þá væri dómari og aðstoðarmenn með skeiðklukkur og mælitæki og eftir bendingum þeirra þá myndi hann skyndilega flauta og vísa einum þátttakandanum úr myndverinu og gefa bendingu sem gæfi til kynna hvers eðlis brotið væri (hljóðmúr rofinn, ítrekunarbrot, atkvæðaekla, ...).
Gaman að sjá stjórnmálamennina svitna, ekki af áreinslunni við að þenja raddböndin, heldur vegna þanþols þolinmæðinnar ;)

Þetta myndi kenna fólki þá tækni að blóta brosandi ;)

Heyrumst :)

Sveinbjörn Pétur

Athyglirör

2006-02-01T04:05:00.000-08:00

Ég man óljóst eftir því þegar ég var í grunnskóla í íþróttum hvað maður var óþolinmóður að byrja á boltahluta tímanna en hafði það sterklega á tilfinningunni að upphitunin myndi engan enda taka.

Ég er reyndar enn á þeirri skoðun að maður sé kominn út í einhverjar öfgar í íþróttaiðkun þegar maður stundar íþróttir einungis af skyldurækni og/eða harðri samkeppni.
Upphitun hefur samt fengið örlítið jákvæðari merkingu í mínum huga þó ég geti eiginlega með engu móti fengið mig til að stunda einhver hlaup nema þá stöku spretti ef markmiðið er að ná til bolta eða einhvers annars takmarks í hópíþróttum.
Ég held þetta sé aðallega eirðarleysi því mér finnst yfirleitt ekkert erfitt að keyra mig áfram í stuttan tíma eða þá í lengri tíma með mikilli fjölbreyttni. Þetta er þó ekki "eirðaleysi í fótum" því það virðist vera e.k. "heilkenni".

Annar hlutur sem reynir mikið á þolinmæði mína er fyrirbæri sem maður var skikkaður til að gera eftir æfingar þegar maður var yngri en svo kom e-t millibils ástand þar sem hætt var að skipa manni fyrir og seinna lenti ég meira að segja í því að einhverjir töluðu beinlínis um óhollustu og hættur sem fyldu þessu.
Hér er ég auðvitað að tala um teygjur og þó maður sé farinn að fikra sig áfram með þetta aftur þá "býr" maður ennþá að því að hafa verið leyft að ráða hvort maður sleppti þeim á tímabili, að ég tali nú ekki um þann áróður sem rekinn var gegn teygjum í hópi stráka sem ég stundaði eitt sinn fótbolta með (hryllingssögur um lausa ökkla höfðu mikil áhrif, meira að segja á teygjur á alls óskyldum vöðvum).
Það er kanski ekki skrítið að þegar ég hóf að stunda TDK (Tae Kwon Do) sumarið 2005 þá var maður spurður að því hvort maður hefði stundað fótbolta og það fylgdi sögunni að þeirra reynsla af eldri nýliðum væri sú að stirðastir væru þeir sem kæmu úr boltanum.

Í augnablikinu er ég hvorki að stunda "hnjábana" (fótbolta) eða teygjur en það er einfaldlega vegna þess hve mikið ég hlífi mér vegna nýlegra hnjámeiðsla en þegar það lagast þá reikna ég ekki með miklu boltasparki heldur munu teygjurnar og hættuminni íþróttir aukast til muna.

Það eru væntanlega til öfgar í öllu, ofálag vegna ofþjálfunar, tímaleysi vegna of þéttrar æfingaáætlunar, svefnleysi af sömu orsökum, sjálfsmyndarbrenglun (allt snýst um markmiðið, einstaklingurinn verður lítið annað en mælipunktur á stikunni milli upphafs og markmiðs) og svo auðvitað "regnboga vandamálið" þ.e. takmarkið sem allur tíminn fer í að ná breytist stöðugt og færist undan, stundum jafnvel hraðar en ávinningurinn í átt að því.

En ætli þetta sé ekki bara eins og með peningana og söfnun þeirra, flestir geta bent á utanaðkomandi dæmi um einstaklinga sem gengið hafa lengra en þeir ættu að þurfa í söfnun auðs en fæstir eru til í að viðurkenna að þeir séu eiginlega komnir með alveg nóg sjálfir ;)

Það er því vissulega hægt að verða óþarflega sterkur, og væntanlega einnig óþarflega lipur þó mælikvarðinn á það hvenær það er orðið óhagkvæmt sé auðvitað tíminn sem menn fórna í það frekar en styrkurinn og liðleikinn sem menn ná :)

Hér er t.d. einn í liðugri kantinum, skyldi hann hafa fórnað tíma frá fjölskyldu og vinum og þarf hann þennan liðleika í raun og veru ;)

Svo smá orðaföndur í tilefni af EM:

"Þökk fyrir alla stuðningsmennina, við vorum nefnilega alveg að sligast undan öllum áhangendunum"

Ef einhver er að velta fyrir sér fyrirsögninni þá er þetta einfaldlega orð sem ég rak augun í (óeiginleg merking) og næstum því tærnar í (eiginleg merking) haustið 2005 og hef séð annað slagið síðan þegar ég er á ferðinni í vinnunni, alltaf á sama stað, hvergi annars staðar ;)

Heyrumst :)

Volk og varmi ....

2006-01-19T13:09:00.000-08:00

Var að aka í vinnunni nýlega og sá þá sólina gægjast fram og þá kom þessi magnaða birta sem kemur yfirleitt bara þegar allt er á kafi í snjó :)
Þetta minnti mig á skólaskíðaferðirnar frá því í grunnskólanum sem í minningunni voru alltaf farnar í glampandi sól og logni ;)
Eftir langan dag á skíðum þá kom maður oftast frekar kaldur inn í skálann og þá var svo ótrúlega notalegt að setjast upp við næsta rafmafnsofn og setja iljarnar og bakið upp að og finna svo hvernig hitinn mýkti mann allann upp, þvílíkt þægilegt og maður var ekkert að vilja yfirgefa ofninn, ekki ósvipuð tilfinning og heitur pottur nema hvað húðin soðnaði ekki eins og í vatninu og því "endalaus unaður" ;)

Það er eiginlega samt svo að mér hefur ekki þótt neitt spés að setjast upp við ofn nema þegar ég er búinn að kólna niður við eitthvað basl í snjó en þá er það líka tóm sæla :)

E.t.v. er þetta líkt og þegar maður breiðir sængina upp fyrir haus og andar í einhvern tíma að sér stöðnuðu loftinu því þegar maður dregur sængina svo aftur frá andlitinu þá er þetta venjulega andrúmsloft í herberginu allt í einu eitthvað svo óhemju ferskt :)

Önnur svona sæluminning um öfga er þegar ég fór í kalda sturtu um borð eftir að hafa labbað úti á Spáni í hitanum í talsverðan tíma sumarið '89, ég var talsvert lengi undir bununni áður en mér fór að finnast vatnið kalt ;)

Ef nöfn hefðu áhrif á það hvernig einstaklingurinn yrði, þ.e. segðu til um eiginleika fólks, þá væri tilvalið að velja til starfa sem sigmenn hjá þyrlusveit gæslunnar eða til eggjatöku menn sem hétu "Sigfús" ...

Það er stundum sagt á Ensku: "If life gives you lemons, make lemonade" þegar eitthvað bjátar á í lífinu.
En fyrir "magnaða" fólkið og ofurhetjurnar þá yrði þetta líklegast:

"If life gives you powers, make powerade" ;)

Heyrumst :)

"Myrtu mig mjúklega"

2006-01-17T14:18:00.000-08:00

Þó þessi orð hafi eflaust ekki verið Theo van Gogh efst í huga í nóvemberbyrjun 2004 þá var ég að uppgötva tengingu, frekar langsótta að vísu, frá laginu "Killing me softly" sem "flakkarinn" samdi og flutti í eitt sinn og Fugees endurgerðu að þessum leikstjóra, sjáið þið samhengið?
Meira um það síðar :)

Annars er Íslenskan alls ekki "víxlið mál" merkingarfræðilega séð eins og svo mörg dæmi sanna t.d. er mikill munur á því að "láta skeggið vaxa" eða "láta vaxa skeggið"!!
Það er meira að segja ekki sérlega vel merkingarfræðilega "tengið" sbr. setninguna "hundar bitu menn og konur, hlupu burt og geltu", fer alveg eftir því hvort þetta var sett saman úr "hundar bitu menn og konur" og "hlupu burt og geltu" eða "hundar bitu menn" og "[ritskoðað]"!
Setningin hér á undan er fengin að láni frá einhverjum fræðum um mikilvægi kommusetninga :)

Smá gráslepjuæfing:
Nefnið 4 "eighties" smelli sem komu fram í sinni hverri bíómyndinni frá þessum tíma með sínum hvorum flytjandanum en voru allir samdir af Giorgio Moroder, (hint: tNeS, ED, F, TG)

Heyrumst :)

Vinsamlegast drepið á bílnum!!!

2006-01-14T17:32:00.000-08:00

Ef það er vinsamlegt hvað er þá óvinsamlegt!!

Annars hefur maður séð ýmsa spekina í stuttum heimsóknum á leikskólana og kannski bara eins gott því yfirleitt fer ég þaðan svo gott sem tómhentur þrátt fyrir að koma nánast alltaf með heilmikið af verðmæti til þeirra ;)

Fyrir nokkrum mánuðum sá ég t.d. titil á bók sem var eitthvað é þessa leið: "Everyone has got a shadow except ants" ...

Svo sá ég síðasta föstudag (13. jan. 2006) skrifað á örlítinn miða á einni hurðinni "vinsamlegast lokið dyrunum" og ég er næstum því viss um að ástæðan fyrir því að ég tók eftir þessu er sú að á flestum stöðum þar sem ég hef séð "beiðni um lokun" þá er það einhverra hluta vegna hurðin sem manni er ætlað að loka!!!
Ef þið vitið um einhverja sem er enn að basla við að reyna að "loka hurðum" þá getiði sagt þeim frá mér að næst skulu þeir ekkert vera að loka skápum og gosfloskum heldur ættu þeir að gæta samræmis og loka bara skápshurðum og gostöppum! Svo ættu þeir auðvitað ekki að þurfa að byrgja brunninn því börnunum hlýtur að vera óhætt ef þeir bara tryggja það að hlemmurinn sé lokaður ;)

Annars er alveg magnað allur sá "fróðleikur" sem stofnanir samfélagsins mata okkur með:
Leikskólinn fræðir okkur um jólasveina og skuggalausa maura.
Kirkjan telur okkur trú um að til sé fullkomið góðviljað afl sem fer samt í "eilífðar fýlu" út í þá sem ekki trúa blint á einkennilega ósannaða hluti í lifanda lífi.
Bankarnir telja okkur trú um að með því að skera eigin neyslu alveg við nögl meðan maður er á besta aldri en lána þeim aurinn þess í stað til áhættufjárfestinga þá muni maður verða forríkt elliært gamalmenni og engu skipti þótt heilsan sé farin í öllum þessum sparnaði þegar þar að kemur.
Málpípur ríkisvaldsins reyna svo að telja okkur trú um að "hagvöxtur" sé hugtak sem færi öllum hamingju þó svo að stóraukinn innflutningur á jeppum hafi eitt sinn verið marktækur hluti þessarar stærðar og þar fyrir utan virðist velta skipta mestu máli óháð því að þar sé ekki gerður skýr greinarmunur á skuldum og eignum! Látum bara hjól atvinnulífsins snúast hraðar og hraðar þangað til hagkerfið bræðir úr sér og þegnarnir brenna út andlega og líkamlega!
Mögnuð líking þetta með kökuna sem sé alltaf að stækka og þar með megi misskipta henni fyrir vikið, eini gallinn er að þar sem aukinn kaupmáttur launa miðast við meðallaun þá eru góðar líkur á því að á meðan misskiptingin eykst þá aukist kaupmáttur meðallauna það lítið að kaupmáttur lægstu launa nái ekki að fylgja verðlaginu og rýrni því í raun!!

Er það furða þótt stór hluti fólks trúi fáránlegustu hlutum þegar stofnanir þjóðfélagsins sameinist um að "uppfræða" það frá unga aldri ;)

En eins og sagt er á ensku "ignorance is bliss" og því eru örugglega talsvert margir sem eftir góðan dag á skrifstofunni þar sem náðist að minnka launakostnaðinn um 17%, leggjast til hvílu í rúminu heima á aðventunni vitandi það að þar sem þeir hafi nú blíðkað hinn uppstökka, fýlugjarna, refsigjarna en þó fullkomna "yfirmann" sinn með reglulegum heimsóknum einu sinni í viku að hlusta á handahófskenndan útdrátt úr mótsagnakenndum sagnabálki, þá sé framtíð þeirra tryggð og þeir muni án nokkurs vafa fá smá hagvöxt í skóinn frá jólasveininum ;)

Smá gáta í lokin, ekki svinla með því að leita á netinu að báðum orðunum saman ;)

Hvað er meint með: "Technicolor Yawn"?

Lofthæna 12

2006-01-07T16:03:00.000-08:00

Þar sem ég hef aldrei (svo ég viti til) verið skráður í "C&C" (e. Cast and Crew) í neinu þeirra verka sem skráð eru á http://www.imdb.com/ þá er ekki búið að útvega mér "Bacon-number" og þar sem ég hef ekki heldur (svo ég viti til) skrifað grein í samstarfi við annan stærðfræðing (né heldur án samstarfs) þá er ég ekki heldur búinn að verða mér úti um "Erdős-number"!

En ég dey ekki ráðalaus og hef því ákveðið að búa mér til mitt eigið viðmiðunarkerfi :-)
Nú heldur fólk að ég hafi ákveðið að hanna "Sveppa-töluna" en þó ég fái það nú oft á tilfinninguna að ég sé nafli alheimsins þá hef ég ákveðið að nota annan einstakling sem viðmið (enda er Bacon ekki miðpunktur "Kristþyrniskógs") ;-)

Í mínu kerfi er ég með 12 sem "Lofthænu-tölu"! :-)
"Hvernig færðu það út" spyrjið þið eflaust, jú ég einfaldlega tel skrefin sem ég þarf að taka frá mér í gegnum ættartréð undir Íslendingabók að eina skráða einstaklingnum hjá þeim með þessu nafni (8 skref upp að sameiginlegum forföður og 4 skref niður að Lofthænu) :-)

Ég er sem sagt "Lofthæna 12" ;-)

Military intelligence

2006-01-03T13:04:00.000-08:00

Þetta er dæmi um það sem á ensku kallast "oxymoron" en auðvitað er soldil friðarpólitík fólgin í því að telja þetta með sem "oxymoron". Skýrara dæmi væri auðvitað "living dead" (eða jafnvel "head butt" og "pretty ugly") :)

Fleiri "oxymoron" má m.a. finna á slóðinni:
http://www.oxymoronlist.com/

Þetta leiðir hugan auðvitað að "hálf-dauðum köttum", því köttur sem er bæði lifandi og dauður hlýtur eiginlega að vera "hálf-dauður/hálf-lifandi" en þessir óheppnu kettir koma helst við sögu í skammtafræði sem hér telst grein innan eðlisfræðinnar en ekki innan lyflækninga eins og einhverjum hefði hugsanlega dottið í hug ;)

Annars eru tvö hugtök sem koma upp í hugann þegar ég spái í "oxymoron".
Ef maður fer út í búð og ætlar að kaupa ákveðinn hlut sem vanalega er á sölulista búðarinnar þá má ætla að varan sé annað hvort til eða þá að hún sé búin, hvað má þá segja um það ef varan er "tilbúin" eða "búin til"?! :)
Ef sagt er um einhverja manneskju sem er í góðu hlaupaformi þ.e. "þolin" að hún mæðist seint hvað þýðir þá eiginlega það að segja að einhver manneskja sé "þolinmóð"?! ;)

Tvær tilvitnanir í lokin:

Þessi hljómar skondið :)
"Do infants have as much fun in infancy as adults do in adultery"?

Þessi er eitt besta andsvar við "stríði í þágu friðar" sem ég man eftir ;)
"Fighting for peace is like fucking for virginity"

Reyndar soldið lélegar tilvitnanir því ég veit ekki í hverja ég er að vitna!! :)

Heyrumst :)

Tvö-þú-sund-og-sex!!!!

2006-01-01T06:58:00.000-08:00

Jæja, bara nýtt ár og það gamla fór í hvelli (ennþá með hellur, púðurflyksur í hárinu og stíflaður og hás af mekkinum) :)

Heilu fjölskyldurnar fullar, krakkarnir óþreyjufullir, foreldrarnir blindfullir, gamlir frændur, frænkur, ömmur og afar sumir fordómafullir og ekki má gleyma þeim sem toppa þetta með því að vera ástríðufullir (hvaða merkingu sem menn vilja annars lesa út úr orðinu ;) )

Talandi um orðið "fullur", fólk sækist allt of mikið eftir endanleikanum, fólk vill verða "fullfært", "fullkomið" og "fullorðið" auk þess sem sumir eru titlaðir sem "fulltrúar".
Ef við spáum aðeins í því þá hittum við aldrei "fullorðið" fólk, þ.e. fólk sem "verður ekkert meir" enda væri það soldið hrollvekjandi að mæta einum "fullorðnum" í myrkri eins og allar myndirnar um uppvakninga hafa frætt okkur um í gegnum tíðina ;)

Eins er þetta með fullkomið fólk, það á aldrei að setja sér markmið að verða fullkominn því flestir eru ekkert á leiðinni að ná því fyrir utan "hvað svo" vandamálið og auðvitað sorglegar grafskriftir: "Hér hvílir Jónmundur Sigurbjartur Þortýrsson, hann náði því að verða fullkominn áður en hann lést"!!
Þar fyrir utan er auðvitað hræðilegt að vera nálægt fólki sem heldur eða jafnvel heldur því fram að það sé fullkomið en þar fyrir utan er auðvitað alveg hræðilegt þegar maður fær þá grillu í höfuðið að einhver annar sé svo gott sem fullkominn því þá getur maður átt erfitt með að nálgast þá manneskju, veit ekki hvernig maður á að haga sér :)

Það er nú reyndar alveg gott og blessað að stefna að því að verða fullfær, ef maður svo bara áttar sig á því þegar maður nálgast þau mörk sem maður miðaði við í upphafi að maður getur svo sem alltaf gert betur og eins að stundum þarf maður bara ekki að gera best heldur bara nægjanlega vel, það er allt of mikið um "over-optimizers" (skyldi það þýðast sem "of-bestarar") ;)

Hvað "fulltrúana" varðar þá gæti ég örugglega ekki orðið góður "fulltrúi" því ég virðist alltaf efast eitthvað um allt, meira að segja fór ég að efast um að það ætti við um alveg allt þegar ég var að skrifa þetta ;)

Annars gæti ég líklegast ekki heldur orðið "formælandi" neins fyrirtækis sem ég ynni hjá eða ætti því ég gæti ekki hugsað mér að vera tengdur fyrirtæki eða samtökum sem ég fyndi mig knúinn til að "formæla" ;)

Smá gáta í lokin, hvaðan er þessi tilvitnun?:

"Add a dab of lavender to milk; leave town with an orange, and pretend you're laughing at it."

Heyrumst :)

Þoddláksmessa!!!

2005-12-28T14:47:00.000-08:00

Lengi vel stóð ég í þeirri meiningu að ég væri aðeins með "hálf-Skaftfellskan" framburð!

Þannig er nefnilega mál með vexti að ég heyrði talað um svokallaðann "rn/rl" framburð þegar ég var í framhaldsskóla og vissi að ég var soldið raddaður í "rn" og skólafélagar mínir frá því í barnaskóla (sem ég ber fram með "rn" en ekki sem "badnaskóli") kannast við það að ég sagði Birna þegar þeir sögðu flestir "Bidna" (eins með járn og hérna/þarna).
Hins vegar sagði ég "vardla" þegar ég bar fram orðið "varla" þó að vísu segðu sumir hinna "vadla" :)

Rétt fyrir þessi jól komst ég hins vegar að því að rótgróin útvarpsrödd á Rás 2 (ein sem er alltaf með auglýsingarnar á Rás 1/Rás 2, síðustu 69 árin eða svo) talaði um Þoddláksmessu-eitthvað í einni auglýsingunni og fattaði um leið að í a.m.k. þessu tilfelli notaði ég "rl"-framburð eða því sem næst. Svo ég er e.t.v. oggolítið "Skaftfellskari" í framburði en ég hélt ;)
Tek það þó fram að ég hef aldrei búið á Suð-Austurlandi en bjó lengi í Hveragerði. Engin "hv"-framburður þó ;)

Annars þjáist ég af ákveðinni meinloku með "guð", því þegar ég þarf að gefa upp fullt nafn (Sveinbjörn Pétur Guðmundsson) þá segi ég einmitt "Guðmundsson" en ekki "Gvuðmundsson" en samt segi ég "Gvuðmundur" og "Gvuðmundsson" í nöfnum allra annarra, spurning hvort þetta séu bara leifar frá því hvernig ég talaði sem krakki og það komi alltaf fram í þau fáu skipti sem ég gefi upp fullt nafn ;)
Annars segði ég oft "gónó'gu'gei'mi'i" áður en ég fór að sofa þegar ég var lítill ;)

Smá gáta í lokin. Hvað þýðir "karta karta"?

Heyrumst :)

Mannvinur?

2005-12-26T12:42:00.000-08:00

Heyrði á einhverri útvarpsstöðinni í síðustu viku viðtal við einhvern meðlim hóps sem kallar sig Hrútavinafélagið. Man reyndar ekki margt úr viðtalinu enda var ég að vinna en þó festist eitt atriði. Þeir ætluðu nefnilega að slátra hrút með einhverjum fornum aðferðum.

Nú segi ég nú bara, ef það er ekki nógu óvinsamlegt að slátra vinum sínum hvað segir maður þá um þann sem ákveður að nota til þess gamlar og úreltar aðferðir þar sem skyndidauði er e.t.v. ekki tryggður!!!

Ég er því ekki lengur viss um að ég vilji kalla mig mannvin opinberlega alveg á næstunni því ekki vil ég að vinir mínir fari að óttast mig.....

Annars smá gáta í lokin. Hver er merkingarmunurinn á eftirfarandi setningum:

A: Vél smurð vel.
B: Vel smurð vél.

Soldið lúmskt en munur samt segi ég :)

Heyrumst :)

Mild Jól :)

2005-12-24T16:21:00.000-08:00

Til að byrja með vil ég nú óska þeim sem þetta lesa gleðilegra og umfram allt notalegra og afslappandi jóla, fólk verður hreinlega að einbeita sér stíft og hamast við að hvíla sig þessi jólin, því þau eru svo afskaplega stutt þetta árið :)

Tek það strax fram fyrir þá sem ég "boðaði" hingað með SMS að ég mátti til með að prufa að "plögga" síðunni minni um leið og ég færi í gegnum listann af símanúmerum í "gemsanum" mínum og sendi öllum þar sem ég hef eitthvað spjallað við að ráði jólakveðju ;)
Smá sjokk að sjá símann segja að fjöldinn sé 101 :)

Ég veit að sumir eru eitthvað að pirra sig yfir "lit" jólanna, tala væntanlega um rauð jól, eitthvað vanti upp á hvíta litinn. Þarna held ég að sé soldill misskilningur á ferðum, bestu jólin fyrir nútíma fólk eru einmitt svona: Hlýtt í veðri, góð færð á vegum og sólin ekki í augun á þeim sem þurfa að aka um milli jólaboða og dreifa pökkum :)
Auk þess er þessi hlýi og mildi grái litur einmitt það sem til þarf til að reyna að slá á jólastressið hjá sumum ;)

Sjáumst/heyrumst sem fyrst :)

Sveinbjörn Pétur

LÖG

2005-11-19T21:12:00.000-08:00

Ef þið verðið vör við að einhver þykist vera sérfræðingur þegar kemur að því að fjalla um "lög" þá væri e.t.v. ekki úr vegi að spyrja þann hinn sama hvaða "lög" hann er að tala um þ.e. hvað af eftirfarandi lögum hann sé að tala um eða hvort hann geti fundið fleiri dæmi eða betri flokkun ;)

Landslög/Fjárlög/Umferðalög/....
Dægurlög/Þjóðlög/Danslög/....
Þvottalög
Snjóalög/Jarðlög/Berglög/....
Hnífslög/Sverðslög/Spjótslög/.....
Faðmlög
Örlög/Forlög/...
Bókaforlög
Félög/Samlög/...
Ferðalög

Mér hefur sjálfum ekki tekist að fækka flokkunum úr þessum 10 auk þess að hafa ekki fundið aðra óskylda flokka :)

Allt sem ekki flokkast í þessa 10 flokka hljóta að teljast "ólög" ;)

Spurning með "umslög", hvort er eintalan "ums-lag" eða "um-slag"?

Gömul gæra

2005-11-16T19:18:00.000-08:00

Undanfarna daga hef ég eytt miklum tíma láréttur þar sem ég hef ekki getað stundað hefðbundnar íþróttir því mitt val á íþróttum hefur verið 14-15 klst. í viku þar sem báðar lappirnar þarf til (fyrir utan auðvitað hjólreiðar til og frá íþróttahúsum, betra að hafa báðar lappir í lagi) :)

Það hefur að vísu ekki gengið upp að hafa löppina alveg beina en ég reddaði mér gamalli gæru til að hafa í rúminu svo nú er veran í rúminu miklu þægilegri, eini gallin er sá að gæran er gömul og lyktar eftir því en hún gerir sitt gagn nema þegar hún á það til að breiða úr sér þegar ég hef í ógáti sparkað í hana því þá réttist úr löppinni og það getur verið talsverð pína samfara því að vakna upp með fótinn beinann.

Annars ætti maður ekki að tala illa um gæruna, hún er nú eiginlega hið besta skinn greyið :)

Gulir og glaðir

2005-11-16T18:10:00.000-08:00

það má lesa ýmislegt út úr númeramerkingunum á strætó, t.d. "S1"sem skv. því væri ekki heppilegur valkostur ef maður þarf að flýta sér en samt á gamla númerakerfið mögnuðustu áletrun sem ég hef séð (sett í samhengi við umræðu síðustu ára):

6 Grandar

:)

Draumfarir, ófarir, svaðilfarir o.s.frv.

2005-11-08T06:56:00.000-08:00

Flestar "farir" virðast vera heldur óhagstæðar. Menn segja "farir" sínar ekki sléttar, menn líða fyrir hamfarir (eða fara hamförum) og lenda svo í einhverjum óförum þegar þeir hafa álpast til einhverra svaðilfara.

Einn staður virðist þó vera nokkuð öruggur þegar "farir" eru annars vegar því eftir erfiðan dag er mjög gott að skella sér upp í rúm, hafa ljósið kveikt og ... fara að sofa því ég hef komist að því að mig dreymir mun meira með ljósið kveikt heldur en ef myrkt er í herberginu.
Það er að vísu hægt að finna ókosti við draumfarir en þá er yfirleitt um að ræða ytri aðstæður sem skemma fyrir manni. Draumsvefn er víst ekki jafn hvílandi eins og draumlaus svefn og því þarf meira af honum en eini gallinn við það er í raun bara utanaðkomandi tímaþröng.

Nýlega varð ég reyndar fyrir annars konar vandræðum af völdum draumsvefns en það kom líka til vegna utanaðkomandi aðstæðna og það meira að segja vegna annarra "fara"!
Málið var sem sagt að ég lá uppi í rúmi og var eitthvað að dreyma eins og gengur nema hvað þessi hluti draumsins virtist ganga út á það að einhver var að segja mér að stór hluti frumárása í TKD (þ.e.a.s. hið kóreanska TaeKwonDo) væru "fake" og ég ákvað af minni nýfengna inngripi í þann stíl að sýna eitt slíkt sem gengur út á það að "fake-a" dollyochagi (yfirleitt með hægri) en fylgja strax með yeopchagi með hinni löppinni.
Þetta hefði verið allt í góðu ef ekki hefði verið fyrir þá sök að ég hafði nýlega lent í "óförum" og því vaknaði ég upp með andfælum (eru það sérhæfðar fuglahræður!?!) því minnsta hreyfing vinstri lappar síðustu tvo dagana hefur valdið sársauka í vinstra hné sem nú er stokkbólgið og innáblætt.

Ég er annars kominn á þá skoðun að ég sé í raun óttalegur flækjufótur því þetta er í annað sinn sem ég hnjaska mig á hné í boltaíþrótt, núna bandý, síðast vorið 2001 á hinu hnénu í fótbolta, en í hvorugt skiptið get ég fundið annan sökudólg en sjálfan mig því í báðum tilfellum þá sný ég einfaldlega bara á mér hnéð án þess að aðrir hjálpi mér við að vinda upp á legginn! :)

Í augnablikinu þá lítur út fyrir að þetta hnjask falli soldið í skuggan af fyrri hnjámeiðslum því í fyrra skiptið þá slitnaði miðlæga bandið, fremra krossbandið, liðpokinn rifnaði og innri liðþófinn skemmdist það illa að helming hans varð að fjarlægja.
Eins og er virðist fyrsta mat benda til þess að liðbönd hafi sloppið og líklega liðþófar að mestu svo nú er bara næst á dagskrá að ná bólgunum úr hnénu og sjá svo til.
Smá fyrirvari reyndar, síðast tók það ca. 6 vikur fyrir þá á Borgó að breyta matinu úr "líklegast ekki slitið krossband" í það að vera hissa yfir hægum bata og senda mig þá í tékk til sérfræðings sem sá um leið að ég var slitinn og sá (nafni minn Brandsson) hreinsaði ruslið úr hnénu sem hafði í 3-4 vikur hindrað að ég gæti ýmist beygt hnéð eða rétt úr því að fullu.

Það má því segja að neikvæðar "farir" séu aðeins að trufla mig í því að ég njóti áhyggjulaus jákvæðra "fara" ;)

100000

2005-10-27T09:43:00.000-07:00

Þetta ku vera aldur minn í "binary" í dag.
Fólk er alltaf að tala um afmæli en það er eitt af þessum orðum sem mér finnst geta átt við önnur fyrirbæri. Ef fólk "talar af sér" er það ekki e.k. "afmæli"?
Eins þegar menn þurfa að klæða af sér kulda á höndum, nota menn þá ekki "handklæði"?
Þegar menn spiluðu með knatttrjám í fornsögunum á ís, skutu menn þá ekki "skorsteinum"?
Eru til "undirhafnir" og "fjærföt"?

Bara að spá smá :)

Einstaklingsskoðanir vs. Meðaltalsskoðanir

2005-10-15T10:27:00.000-07:00

Eins og tiltill síðunnar gefur til kynna þá bjóst ég svo sem alveg eins við að blogga örsjaldan hérna, meira að segja verð ég að viðurkenna að ég þurfti smá hjálp frá gagnasafni mínu til að keyra þetta í gang því fyrsta blókið varð ekki til 13. október 2005 heldur var þetta smásaga sem ég samdi í einhverri "gúrkutíð" í vinnunni sumarið 1998 þar sem ég vann þá á 3ju (eða var það 4ða) hæð í Hafró!

Hins vegar rak ég fyrir tilviljun augun í einhvern rofa efst til vinstri á blogsíðunni þegar ég var í öngum mínum að reyna að láta mér detta eitthvað nýrra í hug til þess að síðan yrði eitthvað meira en bara ein 7 ára gömul færsla.
Rofi þessi kallast "FLAG?" og þegar ég fór að lesa mig til um tilgang hans og fræði sem vísað er í í útskýringunum, þ.e. "The Wisdom of Crowds", þá fóru nú nöldurcellurnar að virka fyrir alvöru :)

Nú togast yfirleitt á í mér viljinn til að hafa alla á jákvæðu nótunum í kringum mig en um leið viljinn til að mínar skoðanir nái yfirhöndinni (þ.e. hafa síðasta orðið).
Oft þarf ég því að velja á milli þess að segja mínar skoðanir og fylgja þeim eftir eða bera við hlutleysi og leyfa öðrum að halda fram sínum skoðunum því fólk verður eitthvað svo miklu opnara og skemmtilegra þegar það spjallar við mann sem skoðanabróður.
Svo kynnist maður fólki mun nánar þegar það opnar sig eins mikið og það gerir í umræðum á jákvæðu nótunum og því meira sem maður kynnist fólki persónulega því minna freistast maður til að flokka það niður í einhverja hópa skilgreinda af manns eigin einfaldandi fordómum.
Sem sagt manni fer að þykja vænna um fólk því það er ekki lengur einhverjar "stereótýpur" heldur mun fremur einstaklingar sem maður gleðst yfir að hitta enn meir ef manni sýnist maður hafa glatt líka :)
Auðvitað er þetta því einungis val þegar skoðanir eru mjög ólíkar en ég held reyndar að ég sé frekar "dipló" sem sumir mundu eflaust kalla undanlátssemi.

Hafið samt engar áhyggjur, ég er ekki með þessu að segja að skoðanir mínar séu alltaf andhverfa skoðana þeirra sem í kringum mig eru og ég sé bara svo dulur að samþykkja í orði hinar skoðanirnar en vilji ekki láta uppi mínar eigin :)
Bæði er það nú svo að það kemur ekki svo oft fyrir að ég sé mjög ósammála fólki í kringum mig og svo er það nú líka oftast þannig að þó ég andmæli ekki harkalega strax í byrjun þá fer yfirleitt í gang ákveðinn "línudans" þar sem ég reyni fyrst að draga fram þá fleti sem ég er sammála fólki með til þess að komast "jákvæðu hliðinni" hjá fólki og síðan reyni ég smám saman að milda frávikin (því flestir draga eitthvað í land frá fyrstu hörðu skoðununum) og að lokum ef tækifæri er til þá reyni ég á eins hægverskann hátt og mér er framast unt að fá fólk til að velta fyrir sér mínum áherslum sem frábrugðnar eru þeirra skoðunum, fyrst sem hugsanlegum möguleika og síðan sem aðeins líklegri möguleika :)
Annars virkar þetta mjög oft líka á hinn veginn því þegar maður er í þeim farvegi að reyna að finna sameiginlegan flöt til að vinna út frá þá lendir maður oft í því að sjá að það eru frábrygði manns eigin skoðanna sem eru ekki alveg í takt við raunveruleikann og breytast þá skoðanirnar skv. því ;)
Af þessum sökum er maður alltaf feginn að vera ekki sá "hot head" að rjúka upp með mótmæli og þras áður en maður hefur aðeins leyft hinum skoðununum að gerjast í eigin kolli í einhvern tíma. Auðvitað væri maður mjög fullkominn ef maður brygðist alltaf svona skynsamlega við en þar sem ég geng út frá því sem staðreynd að ég sé ekki fullkominn, raunar frekar fjarri því, þá reikna ég að sjálfsögðu með því að ég hafi oft brugðist rangt við í fljótfærni og muni vissulega gera það síðar en vonandi bara æ sjaldnar og geti þá einhvern vegin bakkað jákvætt út úr því :)
Við þetta má svo bæta að hugtakið "fullkomnun" er frekar óljóst í annars breytilegum heimi og yfirleitt er það annað hvort rangt notað eða notað á sem einhvers konar áhersluorð á efsta stig eins og "fullkomin þögn" eða jafnvel sem hálfgerð öfugmæli eins og "fullkomið kæruleysi" (ekki það, það er auðvitað gott að vera með hreina sakaskrá ef maður snýr ögn út úr þessu).
Svo er ég persónulega mikið á móti eltingaleik við fullkomnun því þetta er eitthvað svo endanlegt hugtak, gæti fólk til dæmis hugsað sér að heyra einhvern lýsa þvá að nú þegar hann væri loks búinn að ná því takmarki að verða fullkominn þá veri ekkert að vanbúnaði að skella sér á næsta takmark sem væri að koma sér upp sólpalli við húsið svo hann gæti nú grillað með stæl!!! ;)

En hvað var það annars í þessari "FLAG?" útskýringu sem hratt þessum orðaflaumi af stað og af hverju þessi titill á bloggi dagsins!?
Nú væri freistandi að þykjast hafa gleymt því hvað maður var að hugsa um þegar þessi hingað til löngu skrif hófust enda pistillinn orðinn svívirðilega langur og líkastur sápuóperu þar sem skamt er á milli predikana í umvöndunarstíl annars vegar og kærleiksríkra, allt að því væminna, "öll dýrin í skóginum eiga að vera vinir" orðræðna.
En þó maður sé að því að manni sjálfum finnst frekar kalkaður og þykist oft geta borið fyrir sig aldrinum sem afsökun þá man ég því miður ennþá hvað var kveikjan að skrifunum og því er ekki allt búið enn. Ég get ekki einu sinni lofað því að vera kominn langleiðina, kvíði því raunar að ég sé bara rétt svo kominn með innganginn! Og ekki hjálpar að ég er búinn að skrifa 10 línur í framhaldi af framsetningu spurningarinnar án þess að byrja að svara henni en þetta kallast líklega að teygja lopann eða jafnvel að vera góður pólitíkus! ;)
Ég er svo mikill nörd að ég "update-aði" línufjöldatöluna þegar setningin endaði ekki fyrr en 2 línum neðar, hmmm :)

Málið er sem sagt að þeir vilja meina að blogsamfélagið geti á vissan hátt greitt atkvæði um aðgang sinn að bloggi með "vafasömum skoðunum" þ.a. ef mikið er "flaggað" þá sé efnið þar með dæmt "óheilsusamlegt" og "stimplað varasamt" (nú notaði ég svo mikið af gæsalöppum að erfðafræðingar úti í heimi eru farnir að spyrða saman erfðaefni úr gæsum og þúsundfætlum til að tryggja það að framboðið anni eftirspurninni í framtíðinni en þangað til þúsundfóta gæsir verða algengar þá hefur veiðikvótinn á hefðbundnum gæsum verið aukinn!!!).
Rétta leiðin væri að sjálfsögðu að láta síðurnar standa en fá þá sem þarna koma að óbreyttu til með að flagga til þess að skrifa þess í stað andsvör því eins og allir sjá þá fá hinir "stimpluðu" ekki tækifæri til að sjá eðlilegt litróf annarra manna skoðanna birtast í andsvörum á sínu blóki heldur eitthvert skekkt úrtak þeirra sem komast inn á síðuna og eru þá e.t.v. hinir fáu upprunalegu andsvarendur auk öfgafólks sem dregst að "bannvörunni"!!
Andsvör geta geta nefnilega þróað skoðanir þess sem svarað er á ýmsan hátt, ekki bara snúið skoðununum inn á línu þess sem svaraði heldur einnig leitt til nánari umhugsunar og þá getur jafnvel einhver "3ja hliðin" á málinu komið í ljós.

Svo er alveg stórmerkilegt að þeir skuli nota "The Wisdom of Crowds" til að réttlæta slíka flokkun á skoðunum í "ásættanlega skoðanir" og "varasamar skoðanir" (það skal tekið fram að ég er farinn að nota gervigæsalappir til verndar gæsastofns landsins og þar sem ég hvorki sé né finn nokkurn mun þá hvet ég aðra til að gera slíkt hið sama).
Eitt er að það er nú soldið merkilegt að skv. Vikipedia þá fjallar sú bók um það hvernig réttar niðurstöður nást fram ef allar sjálfstæðar skoðanir eru teknar með í reikninginn þegar leitað er réttu niðurstöðunnar og því dálítið skrítið að rétta niðurstaðan á því hvaða blogg má sjást sé sú að einhver fjöldi geti ákveðið að einhver þeirra séu "óholl" til aflestrar, en hvernig á þá bloggsamfélagið að mynda sér skoðun út frá "öllum sjálfstæðum skoðunum" ef það sér ekki bloggin sem fara í taugarnar á a.m.k. einhverjum lágmarksfjölda bloggskoðenda.
Þetta er e.t.v. ekki bein þversögn (e. Paradox) en a.m.k. er hér ein ákvörðunartaka tekinn með tiltekinni aðferðafræði að takmarka möguleikann á að síðari ákvarðnir geti verið teknar með sömu aðferðafræði!
Annað er nú það að þessi aðferðafræði sem slík er líklegast ekki nothæf nema fyrir hluti sem skipta einstaklinginn takmörkuðu eða engu máli, eins og t.d. markaðsfræði og annað "crowd control" og því freistandi að líta á þetta sem frelsiskerðandi "andlýðræðislega" aðferðafræði sem einungis hjálpi þeim sem hag hafi af því að samfélagið sé í föstum skorðum og hegði sér fyrirsjáanlega.
Stundum fæ ég það lúmskt á tilfinninguna að ég sé ekki vinstri sinnaður í raun heldur nær því að vera andstjórnunarlega sinnaður (anarkisti eiginlega) og oft hef ég nú séð fyrir mér að betra væri að ríkisstofnanir væru skipulagðar þannig að í stað þess að stjórnvöld stýrðu þjóðfélaginu í gegnum þær þá væru þetta bara hlutlausar þjónustueiningar.

Annars verð ég bara svo einstaklega eitthvað pirraður þegar ég fæ það á tilfinninguna að upplýsingastreymið sem almenningur sé gerður móttæklilegastur fyrir séu auglýsingar og annar eyðsluhvetjandi áróður því eins og ég sé þetta þá gildir ennþá þetta með að "bestu hlutirnir í lífinu eru fríir" en það þarf tíma til þess að njóta þeirra og þann tíma skerðum við ef við vinnum okkur til húðar til að "auka hagvöxtinn".
Hagvöxtur er annars bara svo skrítið fyrirbæri, því orðið hljómar jákvætt en samt er þetta svo nátengt þennslu (sem er eiginlega bara lífsgæðakapphlaup fjöldans) sem allir hagfræðingar mæla gegn.

Æ, mér er farið að líða illa yfir þessari umræðu, enda er hún farin að snúast um peninga og peningar hafa einhvern vegin alltaf virkað svo skringilega á mig. Margt má kaupa fyrir peninga og maður veltir þeim möguleikum einna helst fyrir sér þegar maður er ekki með þá en þegar þeir koma þá veit maður ekki hvað best er að gera við þá svo maður endar með því að spara þá (sem stundum er jákvætt fyrir þjóðfélagið og stundum neikvætt) eða lána einhverjum sem hefur betri not fyrir þá ;)

Næst ætla ég að reyna að takmarka mig við lítið afmarkað efni. Ég er gjarn á að missa mig í svona löguðu eins og bróðir minn þekkir svo vel eftir margra klukkutíma "fótabanana" (maður er að kveðja fyrir utan dyrnar en umræðan keðjast bara endalaust áfram þar til annar okkar gefur hinum merki um að nú séu bara lappirnar um það bil að hætta að halda honum uppi) ;)

Gleðisagan ógurlega

2005-10-13T14:35:00.000-07:00

Einu sinni fyrir langa löngu, löngu í öðru veldi, þá var maður á ferð til fjalls í nágrenni við heimili sitt. Fjall þetta var eina kennileitið í hans heimabyggð og ef til vill var það ástæðan fyrir því hve oft hann vandi leið sína að því. Reyndar lét hann sér ekki alltaf nægja að ganga að því heldur gekk hann einnig á það endrum og sinnum en hafið engar áhyggjur, hann gekk ekki á fjallið eins og sumir ganga á vegg heldur væri mun nær að segja að hann hafi gengið upp á fjallið. Eina vandamálið sem þessu fylgdi var það að hversu oft sem hann gekk upp á fjallið þá neyddist hann alltaf til að fara ofan af því aftur þegar hann varð svangur eða bara hreinlega leiður á að sjá alltaf sama útsýnið en eins og ég sagði áður þá var fjallið eina kennileitið í heimabyggð hans og útsýnið því vægast sagt drepleiðinlegt. En stöldrum nú aðeins við augnablikið fyrir löngu lönguna þegar maðurinn var á ferð til fjallsins og ef ykkur finnst sagan svívirðilega leiðinleg til þessa þá get ég huggað ykkur með því að leiðinlegri sögur eru til og það vill svo "skemmtilega" til að framhald þessarar sögu er einmitt í þeim flokki. Nú jæja það mætti halda að þið tryðuð mér ekki því þið eruð enn að lesa þetta. Maðurinn var sem sé á leið að fjallinu, og hvað haldiði að hafi gerst, allt í einu og alveg upp úr þurru án þess að honum gæfist nokkuð ráðrúm til að undirbúa sig þá gerðist bara alls ekki neitt. Venjulega hefði eitthvað átt að gerast úr því það var nú verið að hafa fyrir því að skrásetja þessa sögu en núna brá svo við að það gerðist bara alls ekki neitt.
Nú gekk hann eins og ekkert hefði í skorist, enda hafði ekkert í skorist, á fjallið og staldraði við á toppi þess. Þegar þangað var komið þá horfði hann í kring um sig af gömlum vana og hvað haldiði að hann hafi séð þá. Nú auðvitað sá hann sama gamla marflata og kennileitalausa útsýnið. Hann ældi.